Опубликовано пт, 17/02/2023 - 14:34 пользователем TatFrontu.ru Сугыш белән бергә киселде лә, Киселде шул якты өметләр. Фәридә Шакирова Сугыш ... Бер мизгелдә бөтен нәрсә йөзтүбән килә: тыныч планнар, өметләр җимерелә, күнегелгән тормыш пыран-заран килә. Сугышның беренче көненнән үк запастагы хәрбиләрнең 1905 - 1918 нче елгыларын мобилизацияләү турында указ чыга. Түбән Абдул ягыннан сугышка китүчеләр Таш күпер аша Чирмешәнгә чыгып китәләр. Аларны гаиләләре, туган-тумачалары озата бара. Июнь аенда ук МТСта механизаторлар хәзерләү буенча кыска сроклы курслар ачыла. Ул курсларда авылдашыбыз Гайниева Вәсилә апа, Шәймәрданова Минҗиһан апалар да укый. Гайниева Вәсилә Хәмәтгали кызы, 16 - 17 яшьләрдәге кыз бала, тәгәрмәчле колесный "Фордзон" тракторында сугыш беткәнче эшли. Сугыш беткәч, Бөгелмә шәһәренә тимер юл эшчесе булып китә. Тормыш иптәше белән ике бала тәрбияләп үстерәләр. Шәймәрданова Минҗиһан 1923 нче елда туган. Ул да сугыш башлангач, колхозда тракторчы булып эшли башлый. Дөньялар тынычлангач, гаиләсе белән умарталыкта эшләгән. Музейда Гайниева Вәсилә, Шәймәрданова Минҗиһан апаларның бергә төшкән фоторәсемнәре саклана. Ул елларда авылдагы һәр кеше, һәр хезмәт кешесе: "Барысы да фронт өчен, барысы да Көнбатышта авыр, канкоешлы сугышлар, ә тылда беренче сугыш елы уңышы өчен көрәш бара. Уңышны җыеп алып, азык-төлек запасын тыл өчен дә, фронт өчен дә җитәрлек туплау иң изге максат итеп куела. Район газетасы: "Бер пот бөртек - дошманга безнең снаряд!"- дигән девиз белән чыга. Укучылар, укытучылар колхозчылар белән беррәттән урак уралар, көлтә бәйлиләр, төнлә эскерт куялар. Музеебызда Бөек Ватан сугышы чорында тылдагы барлык авырлыкны үз җилкәләрендә күтәргән Түбән Абдул һәм Елховой авылы хатын-кызларына багышланган китаплар саклана. Сез сугышның барлык авырлыгын Татыдыгыз тылда, авылда. Сезнең батырлыкны тиңләп була Сугышчылар күргән давылга. Эшләдегез кырда ирләр эшен, Икмәк белән тәэмин иттегез. Авырлыкны җилкәгездә йөртеп, Җиңү көнен ашыгып көттегез. Сугыш кырларында ятып калды Сезнең йөрәккә тиң кешегез. Еллар буе, көннәр узган саен, Кайтыр диеп өмет иттегез. Язманы РИЦ «Школа» нәшриятында бастырылган «Түбән Абдул» китабыннан файдаланып, Елховой урта мәктәбнең укытучысы Халидә Шәйхелова әзерләде Источник: https://tatfrontu.ru/node/917794 Язык: Татарский